محدش عنده سبب يفسر بيه سبب الغل والكراهية الجماعية اللي بتطفح كل كام يوم ضد الجميلة الرائعة الفنانة الكبيرة المصرية جدا خالص، شيرين عبد الوهاب، ممكن نتفهم ان فيه ناس عندها أمراض نفسية ما مثلا ولا فراغ وجودي فبتحب تخربش وش أي حد ناجح..

وممكن نتفهم ظروف محرر مواقع الكترونية هايج على العناوين اللي بتجيب ترافيك بيضرب اي كلمتين علشان يكسب شير ونشر بالزيادة ..

لكن لما تلاقي محطات اعلامية وبرامج توك شو مصروف عليها، بتشارك في الزيطة دي تستغرب ازاي وليه يتعاملوا مع ثروة قومية زي الست الجميلة دي ..

مبدئياً الست حتى لو كانت قالت اللي الأخوة نشروه كعنوان (انا خسارة في مصر) مش جريمة يعني لأنها فعلا خسارة في مصر بتاعة النهارده، اللي هي بتدوس برجلها على أي حاجة حلوة ..

لكن هي ماقالتش فعلا والكلام اتحرف بلؤم وبجاحة شديدة، مايخرجش الا من نفس مليانة صديد ..

وهوب الفراغ الوجودي عمل عمايله .

الزيطة كملت ولسه مكملة.. بوستات بتنضح كراهية وعنصرية وطبقية وتعليقات لا تقل قذارة وترند رخيص شغال مالوش اي تفسير

وده شجع كائن زي تامر أمين بسيوني يطلع على الشاشة يشتمها لأنه غيران على مصر طبعاً وصعبان عليه شكلها (اللي هي مصر) قدام العالم وفضل يفكر الناس بجرايم شيرين السابقة والجو الرخيص ده

الحقيقة اللي حصلت من كلام جوزها حسام حبيب، ومن شهادات ناس حضرت إن:

كان فيه صدى صوت في صوتها ازعج الناس.. فقالت لهم يمكن عشان القاعة فيها مرايات كتير بتعكس الصوت.

فقال لها حلمي بكر: صح فعلا.

فضحكت شيرين وقالت (بهزار يعني): "شفتوا بافهم في الصوتيات ازاي؟ والله انا خسارة في مصر"

اللي هو عادي اي كائن محبط بائس زي حالاتنا.. مالوش قيمة حقيقية في مجتمعه ممكن يقولها.. فمابالك بنجمة عالية في السما قاعدة مترستقة وسط جمهورها.

نفس الطريقة الرخيصة في التعامل مع الست الجميلة دي حصلت في كلامها عن شعرها، لما قالت أنا قصيت شعري علشان اوفر مصاريف التسريحات الكبيرة جدا، تاني يوم طلعت العناوين (عملت شعري ب60 الف جنيه)

ونقدر نتخيل كم الشتايم اللي خدتها شيرين وكمية الحقد اللي طفح على السوشيال ميديا ..

آ وبالمرة علشان نفهم قد ايه احنا متزروطين في ربريب معجون بمية كدب، نكمل ان لما ترابيزة قزاز اتكسرت والناس خافت البنيّة قالت بالنص "ماتخافوش انتوا في مصر.. حالا هييجي حد يصلحها"

بس اللي تتقص صوابعهم بمقص شجر مصدّي كتبوا انها قالت "عادي تتكسر متستغربوش أنتم في مصر".

آ المشكلة إن الآي كيو بتاع النوعية دي من البشر مش بيقدر يفهم ان الفنان ده مواطن طبيعي جداً عنده مشاعر وانفعالات وبيغضب وبيهرتل وبيضحك وبيزعل وبيبكي وكده يعني، زينا كده ..

وان النوعية دي من الفنانين هم الأصدق والأنقى مش اللي وشوهم بلاستيك مدهون فازلين ..

ياجدعان الست دي ثروة عظيمة.. شوفوا الناس بره مصر بيحبوها قد ايه، مفيش مطربة مصرية ولا عربية.. من بعد أم كلثوم عرفت تاخد الكم الرهيب ده من المستمعين والمحبين العرب ..

(هامش)

شيرين كان قدامها عروض كتير علشان حفلة راس السنة، فى اسطنبول وفي الكويت وابوظبي ودبي، بس هي قررت تعمل حفلتها اللي هو بتكون الأكبر والأهم بين كل الحفلات في القاهرة لما عرفت من منظم الحفلة ان فيه الفين سايح خليجي مستعدين ييجوا يحضروا الحفلة بالإقامة وتذاكر الطيران..

ورغم ان أجرها في حفلة القاهرة أقل كتير جدا عن أجرها المعروض في حفلات برة بس شيرين (البنت البيئة اللي متربية في منشية ناصر دي) فضلت انها تعمل حفلتها في بلدها ..

الجديد وحسب شهادة حسين حبيب والد حسام حبيب ان كان المفروض يتعمل مسرح وسط النيل واضاءات وشاشات عرض عملاقة.. والمنظم الكويتي اصطدم بكمية فساد فى المصنفات والمسطحات المائية وغيرها من الادارات الحكومية اللي كان المفروض تصدر موافقات على الحفلة وخسر المتعهد الكويتي 14 مليون جنيه ودفع للفندق 5 مليون مستحقات وقرر انه مش ها ييجى مصر تاني ومش ها يعمل اي استثمار فى مصر.
------------------
بقلم: خالد الدخيل

آ